Føroya Felag móti Krabbameini hevur sett Margret Mortensen í starv á skrivstovu felagsins – í hálva tíð og fyribils í eitt ár. Margret Mortensen, sum er 47 ára gomul, er útbúgvin sjúkrarøktarfrøðingur í 1983 og hevur onkologiska og intensiva eftirútbúgving.

Hon hevur nógvar og drúgvar royndir innan krabbameinsøki, hevur síðan hon var útbúgvin sum sjúkrarøktarfrøðingur starvast innan hetta øki. Hevur starvast á krabbameinsdeild á Bispebjerg Hospital í tvey ár, frá 1985 á ymsum krabbameins deildum á Finsen, og var við til at flyta har frá til Ríkissjúkrahúsið, har hon síðan starvaðist á krabbameinsdeild til 1993.

Síðan 1994 hevur hon starvast á onkologiskt ambulatorium á Landssjúkrahúsinum.

Á skrivstovuni hjá Krabbameinsfelagnum fer Margret at taka sær av at ráðgeva krabbameinssjúklingum og avvarðandi teirra eins og at taka sær av øðrum uppgávum saman við Jansy Gaardlykke, sum síðan 1996 hevur starvast í felagnum sum dagligur leiðari. Virksemið í felagnum, sum telist millum størstu sjúklingafeløg í Føroyum, er økt nógv seinnu árini.

Felagið skipar javnan fyri skeiðum, ráðstevnum, fyrilestrum og undirvísing, og tað tekur eisini lut í nógvum fundarvirksemi, bæði í Føroyum og uttanlands. Virksemið í sjálvhjálparbólkunum í felagnum er somuleiðis stórt.

Margret Mortensen byrjar í starvinum í dag 1. mai. Felagið býður henni at vera hjartaliga vælkomna.