Grannakaffi

Grannakaffi er innsavning hjá Krabbameinsfelagnum, har fólk kunnu gera sína egnu innsavning til frama fyri Krabbameinsfelagið. Tað góða er at tú kanst altíð hava grannakaffi, tað bestemmar tú.

„Hvat kann eg gera fyri at hjálpa? Hvussu kann eg gera mun?” Henda spurningin kenna tey flestu, og henda spurningin fær Krabbameinsfelagið javnan frá fólki. Hóast tað til tíðir kann tykjast torført at fáa greiðu á, hvussu ein best kann veita hjálp, so er einfalda loysnin at hjálpa teimum, sum longu hjálpa.

Tú setur tín dám á innsavningina, so leingi tað ikki stríðir móti virðunum hjá Krabbameinsfelagnum.Tú kanst hava Grannakaffi heima, bjóða grannunum til ein drekkamunn og spyrja, um tey vilja lata eitt oyra í bússuna. Tú kanst hava bússuna við til arbeiðis og hava eina innsavning við tínum starvsfeløgum. Tú kanst eisini fara ein túr í grannalagnum við bússuni, hava hana við í skúla, hava loppumarknað, ella tú kanst biðja fólk lata Krabbameinsfelagnum eina gávu, tá tú hevur føðingardag. Ja, møguleikarnir eru nógvir. Nýt hugflogið, tað er tú sum avger hvussu tín innsavning sær út.

Krabbameinsfelagið vónar at fáa innsavnarar kring alt landið. Tey, ið hava hug at hava Grannakaffi, fáa nærri kunning um, hvussu ein ber seg at við at venda sær til Krabbameinsfelagið ella nema sær kunning á www.krabbamein.fo og á facebook.com/grannakaffi

Endamálið hjá Krabbameinsfelagnum er upplýsa um krabbamein, stuðla gransking í krabbameini og hjálpa teimum, sum fáa boðini: ‘Tú hevur krabbamein’. Og at hjálpa teimum, sum eiga tey, sum fáa hesi boðini. Í 45 ár hevur tað borið til hjá okkum at hjálpt. Og tað hevur borið til, tí felagið fær dyggan stuðul. Frá sjálvbodnum. Fyritøkum. Feløgum. Einstaklingum. Takk fyri tykkara áhaldandi stuðul. Hann er grundarlagið undir okkara arbeiði.

Grannakaffi søgur

23/7/2025

Ein hjálpandi hond til Grannakaffi

Armgarð Hammer býr í grannalagnum undir Fjalli í Havn og skipaði í 2016 fyri Grannakaffi fyri aðru ferð. Ellivu ár eru liðin, síðani hon sjálv varð skurðviðgjørd fyri krabbamein, og tá ið hon av fyrstan tíð hoyrdi um Grannakaffi tiltakið, vildi hon fegin rætta Krabbameinsfelagnum eina hjálpandi hond við at gerast vertur fyri Grannakaffi.
14/2/2017

Stuðul og styrki í sorgini

Í fjør helt Dagny Miðskarð fyrilestur til eitt Grannakaffi tiltak hjá svágrinum í Klaksvík. Hetta var ikki fyrstu ferð, at heitt var á Dagny um at greiða frá síni søgu, og fyri hana kendist tað gott enn einaferð at kunna seta orð á ta sorg og tær kenslur, sum gerast lívsins fylgisveinar, tá ið ein missir ein av sínum kæru.
10/1/2017

Grannar til Grannakaffi

Vikuskiftið 5.-6. mars í 2016 varð árliga "Grannakaffi" hildið, og á leið 100 vertir kring landið lótu dyrnar upp fyri fólki og vóru vertir fyri afturvendandi innsavningartiltakinum hjá Krabbameinsfelagnum. Ein teirra var Elinborg Apol, sum býr í Havn.
19/2/2016

Takksom fyri einastandandi hjálpina

Tá ið Laila Reynheim misti mannin av krabbameini, sat hon einsamøll við fimm døtrum og einum stórum húsum í Havn. Ikki bara var hetta ein kreppustøða hjá teimum sum familja, men eisini fíggjarliga gjørdist dagligdagurin ógvuliga tungur fyri Lailu. “Eg visti ikki, um eg kundi loyva mær at venda mær til Krabbameinsfelagið, tá ið eg ikki var limur,” sigur Laila, sum eftir eina tíð tó setti seg í samband við felagið. “Eg eri so ómetaliga takksom fyri hjálpina, vit fingu frá Krabbameinsfelagnum, tí tey tóku sær av okkum sum familja.” Tá ið Laila so frætti, at Krabbameinsfelagið skipaði fyri Grannakaffi og lýsti eftir vertum, var hon onga løtu í iva um, at hetta var góður máti hjá sær at takka fyri hjálpina, hon og døturnar fingu.
15/2/2016

Mangir løkir smáir gera stórar áir

Ein morgun í fjør, tá ið Eydna Gregersen úr Sandavági lurtaði eftir útvarpinum, hoyrdi hon umboð fyri Krabbameinsfelagið greiða frá um Grannakaffi og helt beinanvegin, at hetta var eitt tiltak, ið hon kundi hugsað sær at verið vertur fyri. Tá ið hon segði hetta fyri manninum Atla, tók hann beinanvegin undir við tí. Tey kendu fleiri, ið høvdu stríðst við krabbamein, og mamma Eydnu var eisini vorðin frísk av krabbameini. Hugsanin hjá teimum var, at hetta skuldi verða ein vónríkur dagur samsvarandi virðunum hjá Krabbameinsfelagnum. Fyri ikki at koma tvørt fyri annað Grannakaffi tiltak seinnapartin, gjørdu tey av at hava sítt um morgunin. Eitt av fyribyrgjandi ráðunum hjá Krabbameinsfelagnum er rørsla, og tí gjørdu tey av at skipa fyri einum gongutúri úr Vatnsoyrum og heim til húsini í Sandavági, har tey búgva. Tey, ið ikki høvdu hug at ganga, vóru boðin til ein kaffimunn kl. 11.00.
5/2/2016

Gott fyri felagsskapin

Í glæsiliga bygninginum úti á Argjum halda teir fýra stovnarnir til, Gjaldstovan, Hagstovan, TAKS (stýrið) og Fíggjarmálaráðið, og hóast tey á leið 100 starvsfólkini húsast undir somu lon og at kalla eru grannar, so er ikki so ofta, at tey hittast til nakað felags tiltak. Tey á Gjaldstovuni hildu tí, at Grannakaffi kundi verið eitt gott høvi hjá øllum at hittast til felags morgunmat fríggjadagin 11. mars, dagin fyri sjálvan Grannakaffi dagin í 2015. Malan Johansen, deildarstjóri á Gjaldstovuni, samskipaði Grannakaffi.
4/2/2016

400 gestir til Grannakaffi í Klaksvík

Í 2015 tók Ruth Laksáfoss úr Klaksvík stig til eitt stórt Grannakaffi tiltak í “Gamla Betesda” bygninginum, sum stóð tómur. Ruth greiðir frá, at hon er ein av teim mongu, ið eru frísk av krabbameini, og tá ið hon sá, at Krabbameinsfelagið lýsti eftir vertum til Grannakaffi, helt hon, at hetta var eitt gott høvi at savna pening inn at granska meira á økinum.
29/1/2016

Bindiklubbur kann annað enn at binda

Eins og nógvar føroyskar kvinnur gongur Anna E. Joensen á Strondum í bindiklubba. Tær eru átta kvinnur, ið møtast regluliga og tá ið tær hoyrdu um Grannakaffi tiltakið í fjør, gjørdu tær av at tær vildu verða vertir fyri einum Grannakaffi tiltaki á Strondum. Tær eru tríggjar, ið hava mist mannin til krabbamein og motivatiónin til at gera eitthvørt munagott fyri at savna pening inn til arbeiðið hjá Krabbameinsfelagnum er tí stór.
26/1/2016

Sumbingar standa saman um Grannakaffi

“Eg haldi, tað einasta rætta í einari lítlari bygd sum Sumba er, at fólk sláa seg saman at skipa fyri einum felags tiltaki,” sigur Daniel Johan Lisberg úr Sumba, sum var ein av fýra í bygdini, ið høvdu meldað seg sum vert fyri Grannakaffi í fjør. Sum tað er galdandi fyri fleiri aðrar vertir, vildi Daniel Johan verða vertur, tí hann er raktur av krabbameini, ella er “komin í puljuna”, sum hann sjálvur tekur til. Tá ið tað varð greitt, at tað vóru fýra fólk í Sumba, ið høvdu bjóðað seg fram sum vert fyri Grannakaffi, gjørdu tey av at gera eitt felags tiltak í skúlanum. Skúlin rúmar fitt av fólki og hevur sera góðar umstøður til slík tiltøk, og tey fýra roknaðu við at savna fleiri fólk til eitt felags tiltak í skúlanum, heldur enn fýra tiltøk heima hvør sær.

Uppskriftir

Ein angi av tí góða

Eg føli angan av sandkøku, tá ið eg banki uppá hjá Óluvu Skaale í Grønulíð í Havn. Óluva hevur játtað at gera eitt prát við meg henda síðsta morgun í januar í sambandi við, at lýsingarmyndin til Grannakaffi er av sandkøkuni, sum Óluva eigur uppskriftina til. Hon hevur longu bakað sandkøkur í gjárkvøldið, fyri at eg kann taka myndir og fáa ein smakk, men fyri at fáa alt við, ætlar hon at baka tvær afturat. Hesar báðar tímarnar fer prátið tó víða og nógv longur enn til sandkøkur.

Eitt petti av sólskini í munnin

Oddvør stákast í stóra køkinum í kjallaranum saman við dóttrini, Duritu, og hjálparanum, Martini, tá ið eg banki á dyrnar heima hjá henni á Velbastaðvegnum. Talan er sjálvandi um Oddvør Skarðhamar, sum hevur havt matveiting til bæði høg og lág, almenn og privat, lítlar og stórar samkomur í nærum ein hálvan mansaldur. Eg havi sett Oddvør stevnu, tí hon hevur játtað at geva sítt uppskot um eina køku, sum vertirnir kunnu baka til gestirnar á Grannakaffi í ár.

Grannakaffi við leskiligari køku frá KOKS-kokkinum

Í ár fært tú uppskrift til eina leskiliga kaku, sum ofta stendur á borðinum heima hjá høvuðskokkinum á vælumtóktu matstovuni, KOKS. Ein klassisk fronsk kaka, clafoutis, sum Poul Andrias Ziska og unnusta hansara, Rakul Ingolfsdóttir, hava sett sín egna dám á. Upprunaliga stavar bulurin í uppskriftini frá Instagram-vanganum hjá Christel Pixi, og so hava Rakul og Poul Andrias bygt víðari upp á hana.

Spurningar og svar

Sp: Nær kann eg hava Grannakaffi?
Sv: Altíð.

Sp.: Kann eg fáa fleiri enn eina bússu?
Sv.: Tað kann tú gott, vit senda tær eina bússu, tú kann ringja til okkum um tú ynskir fleiri.

Sp: Kann eg fáa at vita hvussu nógv kom inn til mína innsavning?
Sv: Ja, tú ringir bara.

Sp: Kann eg hava Grannakaffi heima hjá mær sjálvum, bert fyri nøkrum vinum?
Sv: Tað kann tú sagtans.

Sp: Hvat verða pengarnir nýttir til?
Sv: Arbeiði hjá Krabbameinsfelagnum. Peningurin fer út aftur í hjálp til krabbameinssjúklingar og teirra familjur.

Undanfarin Grannakaffi